علامات مقلقة في السن الصغير

الطفل حديث الولادة بيحصل معاه حاجات طبيعية لكن بتكون مقلقة للام وو بتفتكر انها اعراض مرضية او انها بداية ظهور تعب للطفل..

هنتكلم عن خمس حاجات طبيعية بتحصل في السن الصغير لكن بنقلق منها شوية.. 

1 - الصفرا :

ظهور الصفرا عند الاطفال بتكون حاجة طبيعية في حدود ان نسبتها متكونش عالية اوي و في حدود ان الطفل يكون نشيط و بيرضع كويس و ميزانه بيتحسن كويس. 

والصفرا اما بتظهر عند الطفل بتفضل معاه لحد الأربعين طبيعي و مبيكونش في منها قلق.. 

2 - الحبل السري :

مفيش ميعاد محدد للسرة انها تنزل فيه.... يعني ممكن السرة تقع بعد اربع ايام و ممكن برده تفضل الشهر الاول كله. 

كل اللي بنعمله ان احنا نغير عليها بالكحول لحد ما تنشف خالص و تنفصل عن جسم الطفل. 

3 - عماص العين :

معظم الاطفال عينهم بتعمص نتيجة ان القناة الدمعية بتكون مسدودة شوية ، كل اللي بنعمله ان احنا نعمل تدليك لمكان القناة الدمعية و ساعتها الامور بتتحسن مع الوقت بدون اللجوء لاستخدام قطارات العين. 

4 - الحزق :

في اطفال بيكون نسبة الحزق عندهم زيادة شوية، موضوع الحزق ده بيستمر لحد تلت شهور و بيكون طبيعي و غير مؤلم للطفل و ملهوش علاقة بان الطفل عاوز يعمل حمام و مش عارف.... 

5 - عدد مرات التبرز :

عدد مرات التبرز  عند الطفل بتختلف من وقت للتاني يعني ممكن يعمل بعد كل رضعة و ممكن يعمل مرة كل تلت ايام طبيعي ، المهم  التماسك بتاع  البراز و كميته يعني تحديد اسهال و امساك ده بيكون حسب قوام البراز مش اكتر. 

اي حاجة بتحصل للطفل في السن الصغير ممكن نستشير الطبيب و المعالج و نطمن ان مفيش حاجة مقلقة

دكتور حاتم فاروق