معدل نمو الطفل

الطفل الطبيعي اللي مولود في ميعاده بيكون طوله حوالي 50 سم و بيزيد طول الطفل في السنة الأولى حوالي 25 - 30سم ودي تعتبر اكبر زيادة ممكن تحصل للطفل في سنة.
في السنة الثانية ممكن يزد طول الطفل حوالي 13-14 سم
يعني تقريبا بيتولد 50 سم و يكون علي سنة  75 سم و علي سنتين حوالي 90 سم.

بتقل النسبة دي تدريجي لحوالي 5 - 6 سم في السنة الرابعة و ما بعدها حتي يصل الطفل لسن البلوغ فترجع الزيادة تكبر تاني.
اما بالنسبة للوزن وضحنا معدل الزيادة للطفل في مقال قبل كده.

النمو العقلى للطفل :
برده اول سنتين يعتبروا اكتر وقت بيزيد فيه التطور العقلي للطفل وده بيبان في زيادة محيط رأس الطفل في المرحلة دي.
بيزيد محيط رأس الطفل حوالي 12 - 13 سم في السنة الأولى من عمر الطفل، و حوالي 9 - 10 سم في السنة الثانية.
العقل في الفترة دي بتزيد كما و كيفا
يعني حجم المخ بيكبر بسرعة و بتزيد عدد الخلايا في المخ و بعدين الخلايا دي بتترقي بسرعة في الفترة دي

في دراسة بتقول ان كمية المعلومات اللي بيخزنها عقل الطفل اول سنتين بتعادل كمية المعلومات اللي موجوده في رسالة دكتوراه في أصعب العلوم.

الطفل يقعد لواحده من عمر 6 شهور، و يقول اول كلمه ( بابا) علي 8 شهور و يقف علي رحله لواحده اول مرة على 9 شهور و يمشي اول خطوة علي 10 شهور.
علشان كده بتلاقي ان اول سنتين دول اكتر فترة الطفل بياكل فيها علشان جسمه بيزيد في الحجم بنسبة كبيرة و جسمه بيكون محتاج كميات زيادة في الاكل علشان ينمو بشكل جيد. علشان كده لازم نهتم بالغذا السليم للطفل في الفترة دي.

دكتور حاتم فاروق