التطعيمات الإضافية للاطفال

التطعيمات الإضافية للاطفال مهمة جدا زي التطعيمات الاساسية بالظبط علشان كده هي موجودة في معظم الدول ضمن جدول التطعيمات الاساسية....
وفي المقال ده هنتكلم عن بعض التطعيمات الاضافية :

تطعيم الروتا :
فيروس الروتا ده مسبب للنزلات المعوية و يكون مصاحب باسهال بكمية كبيرة و غالبا بيحتاج الطفل للحجز بالمستشفى علشان تعويض فقد السوائل و تصحيح الجفاف....
وتطعيم الروتا منه نوعين.

1 - روتاريكس 
وده عبارة عن جرعتين الفرق بينهم من اربع او ست أسابيع
نبدأ اول جرعة علي عمر شهر و نص كحد ادني ولازم نخلص الجرعتين قبل الطفل ما يتم 6 شهور.

اقرأ ايضا : اكل الطفل فى الشهر الرابع 

2 - روتاتك 
وده عبارة عن 3جرعات الفرق بينهم من 4 لحد 10 اسابيع ولازم التلت جرعات يخلصوا قبل الطفل ما يتم 8 شهور.

تطعيم الروتا ده بيكون عن طريق الفم و غالبا مبيعملش اي اثار جانبية و بيحمي الطفل بنسبة كبيرة من النزلات المعوية بسبب فيروس الروتا.


تطعيم المكورات الرئوية :
ده تطعيم بيكون عن طريق الحقن و بيتاخد للاطفال اصغر من 5 سنوات..
- الاطفال الاصغر من 6 شهور بيكون عبارة عن 3 جرعات الفرق بينهم علي الاقل شهر.
- الأطفال من 6 شهور لحد سنة بيكون عبارة عن جرعتين الفرق بينهم علي الاقل شهر.
- الأطفال من عمر سنة لحد سنتين بيكون عبارة عن جرعتين الفرق بينهم على الأقل شهرين.
- الأطفال الأكبر سنتين بيكون عبارة عن جرعة واحدة.

تطعيم المكورات الرئوية ده بيحمي الطفل من مرض الالتهاب الرئوي.. التهاب الأذن الوسطى.. الالتهاب السحاقي..

 أقرأ ايضا : ازاى تتعامل مع الحرارة العالية 

تطعيم الجديرى المائى :
وده عبارة عن تطعيم بيتاخد حقنة تحت الجلد و بيتاخد في الاطفال الأكبر من سنة.
و ده تطعيم بيحمي الطفل من مرض الجديرى المائى بنسبة 85% حتي النسبة اللي ممكن يجيلهم المرض بيكون خفيف جدا و بيقعد كام يوم و يختفي..

تطعيم الالتهاب الكبدي ا : 
وده تطعيم عن طريق الحقن في العضل بيحمي من مرض الالتهاب الكبدي الوبائي A اللي بيسبب الصفرا للاطفال الكبار نتيجة اكل ملوث بالفيروس.
وده عبارة عن جرعتين بينهم علي الاقل 6 شهور و بتبدأ الجرعة الاولي علي عمر سنة و نص....

دي تقريبا اهم التطعيمات الإضافية المهمة للطفل اللي لازم ياخدها علشان حمايته من الامراض المتوطنة عندنا هنا في مصر..
دكتور حاتم فاروق